Gamalt hús við nýggjari hitaskipan

Húsini hjá Nicolaj Falck er frá 1860-unum, og stendur miðskeiðis í Nólsoyar bygd. Upprunaliga vóru húsini býtt í tvær næstan líka stórar eindir – ella tvey samanbygd hús.  Nicolaj hevur í mong ár búð tí megin, har sum m.a. handil var fyrr.

Seinastu árini hevur húsini verið undir umvæling, og hitakeldan varð skift frá oljufyri til hitapumpu. Í dag eigur Nicolaj báðar eindirnar og búvíddin er nærmum tvífaldað. Hetta hevur havt við sær, at verandi hitapumpa ikki longur orkar at hita alt húsið upp.

Er tað nóg heitt inni?

• Jú, vanliga er tað tað. Av tí at húsini eru frá 1860’unum, so eru tey ikki so væl isolerað, greiður Nicolaj frá.

Tá ið nógvur landsynningsvindur er, er nógvur gjóstur úr kjallaranum og upp í kømrini og tá  hevur hitapumpan trupulleikar við at halda húsið heitt. Støðan var tó tann sama áðrenn hitaskipanin varð skift frá olju til el. Nicolaj er nú í gongd við at bjálva húsini so væl sum gjørligt.

• Við hitapumpuni hava vit kortini altíð nóg mikið av heitum brúksvatni, fortelur hann.

Hetta var ikki støðan tá ið húsið var hitað við oljufýri.

• Tá høvdu vit ikki nóg mikið av heitum brúksvatni, tí at ketilin var ov ltítil. Tað var tá vit valdu grøna orku.  

Nicolaj leggur afturat, at sparingin frá oljufýri til hitapumpu var nærum ongin. Hann vónar tó, at sparingin verður størri nú húsini verða bjálvað væl.

Hví valdu tit akkurát hesa loysnina?

Nicolaj valdi eina luft-til-vatn hitapumpu, tí hendan var lættast at seta til verandi sentralhitaskipan í húsinum. Aftaná seinastu umvælingina, tá húsið bleiv munandi størri, umhugsaði Nicolaj at skifta til jarðhita, fyri at sleppa undan útieindini hjá luft-til-vatn hitapumpuni.

• Jú, meiri av skipanini er inni, jú færri ting kunnu ganga galið. Tað er hetta við Føroyum – salt og sjógvur og alt hetta her, sigur Nicolaj.

Nicolaj fekk eitt gott tilboð uppá eina størri útieind, og av tí at ikki varð neyðugt at skifta innieindina, valdi hann framhaldandi at nýta luft-til-vatn hitapumpuskipanina.

Góð ráð til onnur?

• Tað er at hugsa seg væl um, hvørja upphitingarskipan tú keypir, heldur Nicolaj.

Hann ivast onga løtu í, at eini nýggj hús kunnu fáa stóran fíggjaligan ágoðan av einari hitapumpuskipan.

Afturat hesum er tað ein stórur fíggjarligur lætti at skaffa sær ein grønan málara frá SEV skjótast gjørligt.

• Hesi 50 oyruni fyri hvønn kilowatttíma gera stóran mun, leggur Nicolaj afturat.